Dhurata dhe Gjesti performojnë këngën e re

Mbrëmja e djeshme në Mitrovicë dhuroi një atmosferë të zjarrtë, ku Dhurata Dora dhe Gjesti performuan për herë të parë bashkë projektin e tyre më të ri.

Përveç kësaj surprize, vëmendjen kryesore e morën fjalët e ngrohta që këngëtarja zgjodhi t’i thoshte kolegut të saj direkt nga skena.

Përpara të pranishmëve, Dhurata nuk i kursye vlerësimet për artistin, duke u shprehur:

“Meriton gjithë suksesin që ke dhe me zor pres të dalë kënga nesër.”

Lajmin për lansimin e projektit dyshja e konfirmoi edhe përmes një postimi të përbashkët në Instagram ditën e djeshme, ku bënë të ditur se bashkëpunimi i tyre i shumëpritur, i titulluar “Gasolina”, do të publikohet sot në orën 18:00.

Kjo këngë ka ngjallur prej kohësh një kureshtje të madhe te publiku, e cila u rrit akoma më shumë pasi një pjesë e saj rrodhi së fundmi në TikTok dhe u bë menjëherë virale.

Kujtojmë se “Gasolina” ishte planifikuar të lansohej që gjatë verës së kaluar, mirëpo për shkak të situatës së krijuar rreth Gjestit në atë periudhë, publikimi u shty.

Tashmë, pas një pritjeje të gjatë, kënga është përfundimisht gati për të parë dritën e publikimit.