Policët e shpëtojnë një fëmijë në Liqenin e Batllavës

Një intervenim i shpejtë i zyrtarëve të Policisë së Kosovës ka bërë të mundur shpëtimin e jetës së një fëmije në Liqenin e Batllavës, në Podujevë.

Sipas raportit 24-orësh të policisë, ngjarja ka ndodhur të dielën rreth orës 12:30. Gjatë patrullimit në zonë, një njësi policore i ka dalë në ndihmë një qytetari, i cili sapo kishte nxjerrë nga liqeni një fëmijë në gjendje të rënduar.

Menjëherë pas arritjes në vendin e ngjarjes, zyrtarët policorë kanë ndërmarrë veprime emergjente duke kryer reanimim kardiopulmonar (CPR), gjë që ka ndikuar në përmirësimin e gjendjes së fëmijës.

“Në vendngjarje ka dal edhe ekipi mjekësor të cilët kanë e marrë viktimën për tretman të mëtutjeshëm mjekësor”, thuhet më tej në njoftimin e Policisë së Kosovës.