Policia jep detaje për aksidentin fatal në Komoran ku një person humbi jetën dhe tre të tjerë u lënduan

Një person ka mbetur i vdekur dhe tre të tjerë kanë mbetur të lënduar, si pasojë e aksidentit të rëndë të trafikut që ndodhi në orët e hershme të mëngjesit në afërsi të Komoranit.

Zëdhënësi i Policisë së Kosovës, Daut Hoxha, bëri të ditur se aksidenti ka ndodhur rreth orës 05:30 në rrugën nacionale Pejë–Prishtinë, në afërsi të Komoranit.

“Sot, rreth orës 05:30, në rrugën nacionale Pejë–Prishtinë, në afërsi të Komoranit, është shkaktuar një aksident trafiku me pasoja fatale. Si pasojë e aksidentit (vetaksident), një person ka humbur jetën, ndërsa tre persona të tjerë kanë pësuar lëndime trupore. Njësitë kompetente policore, në koordinim me prokurorin e shtetit, janë duke zhvilluar hetimet për sqarimin e rrethanave të rastit”, thuhet në njoftimin e policisë.

Policia e Kosovës u ka bërë apel të gjithë drejtuesve të automjeteve që të respektojnë rregullat e trafikut dhe të tregojnë kujdes të shtuar gjatë ngasjes, me qëllim të parandalimit të aksidenteve dhe ruajtjes së jetës në rrugë.

Hetimet për zbardhjen e plotë të rrethanave të aksidentit janë në vazhdim.