Stresi bën thirrjen e fortë: Sot në shesh, presim miq edhe nga Prishtina e Shkupi!

Përmes një videoje të ndarë me ndjekësit në Instagram Story, reperi i njohur Arkimed Lushaj, i njohur artistikisht si Stresi, ka bërë një thirrje të fortë për t’u bashkuar në protestat që po zhvillohen aktualisht në Shqipëri në lidhje me çështjen e Zvërnecit.

Ndonëse mban edhe pozicionin e anëtarit të Këshillit Kombëtar të Partisë Demokratike, reperi ka sqaruar prerë se ky reagim nuk bëhet për llogari të asnjë force politike, por vjen si një kauzë plotësisht qytetare.

Në mesazhin e tij, Stresi ka kujtuar angazhimin e tij të gjatë në shesh, duke theksuar se ka plot 13 vjet që ngre zërin për çdo shqetësim dhe padrejtësi që kanë përjetuar qytetarët, madje edhe në kohët kur të tjerët e kanë gjykuar.

Ai u shpreh se identitetin e tij nuk e ndërron për asnjë arsye dhe se kjo protestë u përket të gjithëve, pa dallime.

Për të treguar përmasën e këtij reagimi, ai zbuloi se në tubimin e sotëm në orën 18:00 do të ketë edhe mbështetjen e miqve të shumtë që po vijnë posaçërisht nga Prishtina dhe Shkupi.

Në mbyllje të mesazhit të tij, Stresi bëri thirrje për bashkim duke deklaruar se do të jetë krah popullit, pasi sipas tij, populli mbetet gjithmonë fuqia më e madhe.